Ошто 21 жаштагы кыз экстремисттик материалдарды таратканга шектелди
Ош облусунда диний-экстремисттик агымдын мүчөсү кармалды. Бул тууралуу аталган облустун ички иштер башкармалыгынын басма сөз кызматы билдирди.
Милиция кызматкерлери тарабынан Кыргызстанда тыюу салынган "Хизб ут-Тахрир" диний-экстремисттик агымынын аялдар канатынын лидерлерин жана мүчөлөрүн аныктоо боюнча жүргүзүлгөн иш-чаралардын натыйжасында Кара-Суу районунда Самира (аты өзгөртүлдү) аттуу кыз кармалды. Ал террористтик жана экстремисттик материалдарды таратканы аныкталган.
Факты маалыматтык электрондук журналга катталып, иликтөө иштери башталды. Текшерүүнүн жүрүшүндө Самира кийим-кече сатуучу дүкөндөрдүн социалдык тармактардагы билдирүүлөрүнүн алдына террористтик жана экстремисттик чакырыктарды жайгаштырып, таратканы белгилүү болду.
Соттук-эксперттик кызматтын корутундусуна ылайык, изилдөөгө берилген материалдар Кыргызстандын аймагында тыюу салынган экстремисттик уюмдун материалдары.
Башкы беттеги сүрөт: Аталган окуя боюнча Ош облусунун ички иштер башкармалыгынын кылмыш ишинин материалдарынан.
