Кыргызстандын грек-рим боюнча курама командасы (U23) Азия чемпионатынан экинчи орунду алды
Грек-рим күрөшү боюнча Кыргызстандын курама командасы (U23) Иорданияда өтүп жаткан Азия чемпионатында жалпы командалык эсепте экинчи орунду ээледи.
Ата мекендик үч балбан: Аманат Самат уулу (67 кг), Асан Жанышов (87 кг) жана Нурманбет Раймалы уулу (97 кг) алтын медалга татыды. Биздин команданын эсебинде дагы бир күмүш жана беш коло медаль бар.
Аялдар командасы эки алтын, эки күмүш жана бир коло медаль менен жалпы командалык үчүнчү орунду ээледи.
Нурзат Нуртаева менен Гүлнура Таштанбекова Азия чемпиону аталса, Кайыркүл Шаршенбаева менен Дильназ Сазанова күмүш, Арууке Кадырбек кызы коло медалга ээ болушту.
Бул жыйынтык аялдар командасына катышуучу жети команданын ичинен үчүнчү командалык орунду алууга мүмкүндүк берди. Биринчи орунда Индия, экинчи орунда Казакстан.
Эркин күрөш боюнча мелдеш аяктай элек.
