Ысык-Көлдө туристтик милицияга карата кызматтык иликтөө башталды. Ал аңчылык кылган
Социалдык тармактарда туристтик-экологиялык милициянын кызматкери мыйзамсыз түрдө аңчылык кылып жүрөт деген видео тараган. Бул боюнча Ысык-Көл облустук ички иштер башкармалыгы тарабынан кызматтык териштирүү иши дайындалып, учурда териштирүү иштери жүрүп жатканы белгилүү болду.
Ысык-Көл ОИИБден териштирүүнүн жыйынтыгы боюнча кошумча маалымат берилетрин кошумчалашып, окуя тууралуу буларды билдиришти.
Видеону Тоң районунун Кароол-Дөбө участогунун 31 жаштагы тургуну Ж.А. аттуу жарандын иниси Ж.Б. тартып, социалдык тармактарга тараткан. 31 жаштагы жаран жакында Ысык-Көл ОИИБдин туристтик-экологиялык милициянын кызматкерлери тарабынан уруксат кагазы жок ИЖ-18 үлгүсүндөгү ок атуучу курал менен ошол аймакта аңчылык кылып жүргөн жеринен кармалган болчу.
Аталган факты боюнча Тоң РИИБдин тергөө кызматы тарабынан 267-берене (Куралды, ок-дарыларды мыйзамсыз жүгүртүү) менен кылмыш иши козголуп, тергөө амалдары аяктап, соттун кароосуна жиберилген.
