Айгүл Жапарова Ысык-Көлдө "Ала-Тоо симфониясы" жайкы чыгармачыл мектебин ачты
Чолпон-Ата шаарындагы "Алтын балалык" реабилитациялык комплексинде Айгүл Жапарованын колдоосу менен "Ала-Тоо симфониясы" аттуу биринчи жайкы чыгармачыл мектебинин салтанаттуу ачылышы болду. Бул туурасында биринчи айымдын социалдык тармактагы баракчасында айтылат.
Биринчи айым өз сөзүндө Россиянын Гнесиндер атындагы музыка академиясынын профессорлоруна жана окутуучуларына ыраазычылыгын билдирип, мындан ары Кыргызстан менен Россиянын достугун жана маданий карым-катнашын чыңдоого багытталган биргелешкен долбоорлорду колдой тургандыгын белгиледи.
Айгүл Жапарова аталган чыгармачыл мектептин алкагындагы сабактар жаш музыканттардын кесиптик өнүгүүсү үчүн бекем негиз болот деген ишенимин билдирди.
"Маданиятты, классикалык музыканы жана балетти өнүктүрүү мен үчүн өзгөчө мааниге ээ. Аларда биздин улуттук иденттүүлүктү бекемдөөгө мүмкүндүк берген улуттук байлыгыбыз жатат. Ошондуктан бул чөйрөлөрдү ар тараптуу колдоо мен үчүн маанилүү", - деди биринчи айым.
Жайкы мектептин алкагында Кыргызстандын таланттуу музыканттары үчүн музыкалык искусство чөйрөсүндөгү көрүнүктүү ишмерлер мастер-класстарды, сабактарды жана лекцияларды өткөрүшөт.
