Президент мамлекеттик сыйлыктарды тапшырды. Арасында депутаттар да бар

Бүгүн, 12-сентябрда, өлкөгө жана эл алдында сиңирген эмгеги үчүн мыкты делген инсандарга мамлекеттик сыйлыктарды тапшыруу аземи болуп өттү.

1 из 2

I даражадагы “Манас” ордени менен И.К. Ахунбаев атындагы Кыргыз мамлекеттик медициналык академиясынын травматология, ортопедия жана экстремалдык хирургия кафедрасынын башчысы Сабырбек Жумабеков сыйланды.

III даражадагы "Манас" ордени менен Асан Жакшылыков – акын, жазуучу, Кыргыз Республикасынын Улуттук жазуучулар союзунун президиумунун мүчөсү сыйланды.

III даражадагы "Манас" ордени менен Менди Мамазаирова – акын, жазуучу, драматург, Кыргыз Республикасынын Улуттук жазуучулар союзунун президиумунун мүчөсү сыйланды.

"Данакер" ордени менен Султан Раев - "ТҮРКСОЙ" эл аралык уюмунун башкы катчысы сыйланды.

Кыргыз Республикасынын Эл артисти наамы менен куудул, сатирачы Абдылда Иманкулов сыйланды.

Кыргыз Республикасынын эл акыны наамы менен Улуттук жазуучулар союзунун президиумунун мүчөсү Жедигер Саалаев сыйланды.

"Даңк" медалы менен "Доор" эстрадалык-фольклордук ансамблинин солисти Каныкей Раймалиева сыйланды.

Кыргыз Республикасынын "Ардак грамотасы" менен акын, жазуучу Бердибек Жамгырчиев сыйланды.

Кыргыз Республикасынын Ардак грамотасы менен Т. Абдумомунов атындагы Кыргыз улуттук академиялык драма театрынын артисти Арнис Кыдырмышев сыйланды.

Мамлекет башчы өз сөзүндө ар бир доордун өз каармандары болгон сыяктуу Кыргызстандын соңку тарыхында жакындарынын, тар чөйрөсүнүн гана камын жебей, өлкөм деп иштеген мекенчил инсандар мамлекеттин бакубаттуулугу үчүн ар кыл тармактарда өзгөчө эмгек сиңирип, Ата журтка берилүүнүн үлгүсүн көрсөтүп келатканын баса белгиледи.

Мамлекеттик сыйлык алгандардын арасында Жогорку Кеңештин депутаттары да бар. Алар:

1 из 5

• Шайлообек Атазов, Кыргыз Республикасынын Улуттук бокс федерациясынын вице-президенти, Жогорку Кеңештин депутаты - Кыргыз Республикасынын дене тарбиясына жана спортуна эмгек сиңирген кызматкер деген ардактуу наам менен сыйланды.
• Балбак Түлөбаев менен Лейла Лурова Кыргыз Республикасынын "Ардак грамотасы" менен сыйланды.
• Бактыбек Сыдыков, Жогорку Кеңештин депутаты - Кыргыз Республикасынын транспортуна эмгек сиңирген кызматкер ардактуу наам менен сыйланды.
• Гүлкан Молдобекова, Жогорку Кеңештин депутаты - Кыргыз Республикасынын мамлекеттик кызматына эмгек сиңирген кызматкер ардактуу наамы менен сыйланды.
• Данияр Толонов, Жогорку Кеңештин депутаты - Кыргыз Республикасынын мамлекеттик кызматына эмгек сиңирген кызматкер ардактуу наамы менен сыйланды.

• Жогорку Соттун төрагасы Замирбек Бактыбеков - Кыргыз Республикасынын эмгек сиңирген юристи ардактуу наамы менен сыйланды. Ушундай эле наам Жогорку Соттун судьясы Болотбек Акматовго ыйгарылды.

• Алмасбек Абытов, президенттин жана Министрлер кабинетинин Жогорку Кеңештеги туруктуу өкөлү - Кыргыз Республикасынын мамлекеттик кызматына эмгек сиңирген кызматкер деген ардактуу наамга татыды.

Андан тышкары I даражадагы "Манас" ордени менен режиссёр, Кыргыз Республикасынын Франциядагы элчиси Садык Шер-Нияз, академик, мамлекеттик жана коомдук ишмер Абдиганы Эркебаев сыйланды.

III даражадагы "Манас" ордени Баткен облусунун Лейлек районундагы № 3 мектеп-гимназиясынын негиздөөчүсү, тарых мугалими Гапыр Мадаминовго, альпинист, коомдук ишмер, "Кыргыз Республикасынын альпинизм жана аскага чыгуу федерациясы" коомдук бирикмесинин президенти Эдуард Кубатовго ыйгарылды.