Жалал-Абадда кофе, чай, кургак сүттү мыйзамсыз даярдаган жай аныкталды. Видео
Жалал-Абадда ири көлөмдө кофе азыктарын мыйзамсыз даярдап, сатып жүргөн жаран аныкталды. Бул туурасында облустук милициядан кабарлашты.
Такталгандай, 8-июлда Жалал-Абад ОИИБдин Экстремизмге жана мыйзамсыз миграцияга каршы аракеттенүү кызматына Жалал-Абад шаарынын базарында, соода түйүндөрүндө мыйзамсыз колдо жасалган кофе азыктары сатылып жаткандыгы боюнча ыкчам маалымат түшкөн.
Бул факты Кылмыш-жаза кодексинин 218-беренеси (Мыйзамсыз ишкердик же банктык иш) менен катталып, кылмыш иши козголгон.
Жалал-Абад шаардык сотунун токтомунун негизинде С.Э.нин Кочкор-Ата шаарындагы үйүнө тинтүү жүргүзүлгөн. Анда жасалма кофе жана башка азык-түлүк продукцияларын чыгаруучу 1 даана станок, 3 кап колдо жасалган MacCoffee, кофенин пакети - 11 даана рулон, 72 коробка колдо жасалган Frima кургак сүтү, 2 кап Bayce чайдын сырты, 3 кап колдо жасалган "Мурас" куруту жана 12 капта "Мурас" курутунун сырты алынган.
Ал эми экинчи даректен 132 коробка колдо жасалган MacCoffee, 5 коробка колдо жасалган Frima кургак сүтү жана 1 даана компьютердин процессору табылган.
Азыркы учурда Жалал-Абад ОИИБдин тергөө кызматы тарабынан тергөө амалдары жүргүзүлүүдө.
