"Аю" холдингдин ээси соттун чечими менен сырттан камакка алынды
"Аю" холдингдин ээси Шаршенбек Абдыкеримов соттун чечими менен СИЗО-1ге сырттан камакка алынды. Бул тууралуу Kaktus.media сайтына Бишкектин Биринчи Май райондук сотунан билдиришти.
Маалым болгондой, Биринчи Май райондук сотунун 2023-жылдын 8-сентябрындагы чечими менен ИИМдин Тергөө кызматынын тергөөчүсүнүн арызы канааттандырылган. Айыпталуучу А.Ш.Шга карата сырттан камакка алуу түрүндөгү баш коргоо чарасы тандалды.
Белгилей кетсек, 2023-жылдын апрель айында ИИМдин тергөө кызматы тарабынан Кылмыш-жаза кодексинин "Алкоголду жана алкоголдук продукцияны мыйзамсыз өндүрүү" беренеси боюнча кылмыш иши козголгон. Иш алкоголдук продукцияны өндүрүүнү көзөмөлдөө боюнча мамлекеттик агенттик менен биргеликте териштирилген. Анын алкагында спирт заводдун 3 кызматкери: 1971-жылы туулган "Токмок Буллз" ЖАКтын башкы директору А.А., спирт заводунун күзөт бөлүмүнүн башчысы 1982-жылы туулган М.Т. жана башкы технолог 1988-жылы туулган И.А. кармалган.
Өздүк булактардын маалыматына караганда, Шаршенбек Абыдкеримов өзү чет өлкөдө.
