Асель Ногойбаева абакта жаткан мурдагы күйөөсүнөн коркутуулар келип жатканын айтты
Кулак, мурду кесилген Асел Ногойбаева абакта жаткан мурдагы күйөөсүнөн кайрадан коркутуулар башталганын айтты. Жумшак формадагы коркутуулар 8-июлда түндө башталды дейт Ногойбаева.
"СМС билдирүүлөдү түндө жөнөтүп баштады. Телефон да чалып жумшак түрдө коркутту. Абактан качып чыгып кетүү оңой дейт. Мындай билдирүүлөрдү бүгүн, 9-июлда таң атпай кайра келип баштады", - дейт Асел Ногойбаева.
Ал эми жабырлануучунун жактоочусу Индира Саутова бул боюнча Атайын прокуратурага кайрылганын билдирди.
"Атайын прокуратура кызматына кайрылдык. №3 түзөтүү абагында жаткан Азамат Эстебесовдун жазгандарын, аудио билдирүүлөрүн биз коркутуу катары кабыл алып жатабыз. Биз мыйзамдардын аткарылышын талап кылабыз. Соттолгондордун телефонго жетүүгө такыр мүмкүнчүлүгү болбошу керек", - дейт Саутова
Белгилесек, Асел Ногойбаеванын кулак, мурдун кесип, кыйноого алганы боюнча 2024-жылдын январында Сокулук райондук соту Азамат Эстебесовду 20 жылга эркинен ажыратып, Ногойбаевага моралдык зыян үчүн 2 миллион сом өлчөмүндө компенсация төлөп берүүнү өкүм кылган.
