Ысык-Көлдө катер сүзүп кеткен киши каза болду
Ысык-Көлдө катер казакстандык жаранды сүзүп кетти. Жабырлануучу ооруканада каза болгонун редакцияга облустук ички иштер башкармалыгынан билдиришти.
Маалыматка караганда, 15-июлда Ысык-Көл РИИБине райондук ооруканадан маалымат түшкөн. Анда эс-учун жоготкон абалда бейтап жеткирилгени кабарланган.
Такталгандай, 1982-жылы туулган К.Б. Балыкчы шаарында жашап жаткан Казакстандын жараны болгон. Кара-Ой айылындагы эс алуу жайларынын биринин пляжында катер сүзүп, анын кесепетинен оор жаракат алган.
16-июлда жабырлануучу алган жаракатынан улам райондук оорукананын жандандыруу бөлүмүндө каза болгон.
Тергөө иштеринин жүрүшүндө катердин ээси Ысык-Көл облусунун 1992-жылы туулган М.Б. аттуу тургуну экени такталды. Ал эми катерди 2006-жылы туулган жергиликтүү тургун башкарганы аныкталды.
Бул факты Кылмыш-жаза кодексинин 127-беренеси ("Этиятсыздыктан өлүмгө алып келүү") жана 311-беренеси ("Темир жол, аба же суу транспортунун кыймылынын жана аларды эксплуатациялоонун коопсуздук эрежелерин бузуу") боюнча кылмыш иштери козголгон. Учурда тергөө иштери уланууда.
Башкы беттеги сүрөт иллюстрациялык.
