УКМК Бишкектеги 19 көчөнү оңдоону убадалаган ишканага кылмыш ишин козгоду
Бишкек шаарындагы жолдорду куруу мөөнөтү бузулгандыгы үчүн кылмыш иши козголду. Бул туурасында УКМКнын маалыматында айтылат.
Комитеттин билдирүүсүнө караганда, Бишкек шаарынын бир катар көчөлөрүн реконструкциялоодо жана курууда тийиштүү милдеттемелерди аткарууну кечеңдетүү жана аткарбоо фактылар аныкталды.
"Б.Г" ЖЧКсы тарабынан курулушту кечиктирүүнүн себептери катары - курулуш техникасынын жетишсиздиги, мыйзамсыз курулуштарды бузуу зарылдыгы, жашыл аянттарды кесүү жана кыюу, электр мамыларын которуу жана башка ар кандай жагдайлар белгиленген. Бирок текшерүүнүн жүрүшүндө алар тастыкталган эмес.
"Б.Г." ЖЧКсынын жетекчилиги милдеттенмелерин талаптагыдай аткарбагандыгын толугу менен моюндап, бардык иштерди 2024-жылдын 20-августуна чейин бүтүрүүгө кепилдик берди", - дешет комитеттен.
УКМК мамлекеттик тапшырыктардын алкагында подряддык уюмдардын милдеттенмелерин сапаттуу жана өз убагында аткаруу зарылдыгын эскертет.
