Тазабек Икрамовдун ордуна. Сузак округунда кайра шайлоо өтөт
Экс-депутат Тазабек Икрамов шайланган №13 Сузак бир мандаттуу округунда кайра шайлоо өтөт. Тиешелүү жарлыкка Садыр Жапаров кол койгонун президенттин администрациясынан кабарлашты.
Токтомго ылайык, №13 Сузак бир мандаттуу шайлоо округу боюнча Жогорку Кеңештин жетинчи чакырылышынын депутатын мөөнөтүнөн мурда шайлоо 2024-жылдын 22-сентябрына, жекшембиге дайындалды.
Кыргыз Республикасынын Шайлоо жана референдум өткөрүү боюнча борбордук комиссиясына Кыргыз Республикасынын мыйзамдарына ылайык шайлоону өткөрүүнү уюштуруу тапшырылды.
Белгилесек, №13 Сузак бир мандаттуу шайлоо округунан Жогорку Кеңешке Тазабек Икрамов 2021-жылы депутат болуп шайланган.
2024-жылдын 17-июлунда Икрамов УКМКга суракка чакыртылганы маалым болгон. Бирок расмий органдар да, эл өкүлү өзү да бул боюнча маалымат беришкен эмес.
Кийинчерек Тазабек Икрамов депутаттык мандатын өз каалоосу менен тапшырганын билдирген.
