Ассоль Молдокматова өзбек машыктыруучу Акмал Хасановго Айтматов медалын тапшырды
Бүгүн, 22-августта Ташкентте ШКУнун алкагындагы элдик дипломатиянын эл аралык форуму өттү. Ал эми бул иш-чарада бокс боюнча Өзбекстан курама командасынын машыктыруучусу Акмал Хасанов Чыңгыз Айтматов атындагы медаль менен сыйланды. Аны Ч.Айтматов атындагы Ысык-Көл форумунун башкы катчысы Ассоль Молдокматова тапшырды.
"Татыктуу мушкер Мунарбекти колдоого мүмкүнчүлүк болгонуна кубанычтамын. Биз, боордош элдер, бири-бирибиздин колдообузду сезип жатабыз жана муну Мунарбектин образында дүйнөгө көрсөтүү маанилүү. Кыргыз боксу гүлдөп, жеңишке жетип жатканын көрүп, кошо кубанып турабыз", - деди Акмал Хасанов.
Жогорку сыйлыктан тышкары Ассоль Молдокматова Хасановго чапан жана калпак кийгизип, ага көрүнүктүү сүрөтчү Сабитжан Бабажановдун картинасын жана Ысык-Көлгө саякат тапшырып, Кыргызстанга чакырды.
Эске сала кетсек, Мунарбек Сейитбек уулу кыргыз боксунун тарыхында биринчи болуп Олимпиада медалын (күмүш) жеңип алган. Парижге жеке машыктыруучусу жок келип, финалга өткөн спортчунун окуясы ата мекендик жана чет элдик маалымат каражаттарында кеңири талкууга алынган. Финалдан башка бардык беттештерде Мунарбек үчүн Өзбекстандан келген машыктыруучу Акмал Хасанов көптөн бери тааныш болгон бокс боюнча курама команданын башкы машыктыруучусунун жеке өтүнүчү менен рингге экинчи машыктыруучу - секундант болгон.
