Бишкектин мэри жаңы автобустардын канчасы оңдоодо экенин айтты
Бишкек шаарынын мэри Айбек Жунушалиев канча муниципалдык автобус оңдолуп жатканын айтты.
Жогорку Кеңештин 9-октябрдагы жыйынында депутат Русланбек Жакышов шаар үчүн 1200 автобус сатылып алынганын, күнүнө 1040 автобус каттап, 150-170 автобус оңдолуп жатканын белгиледи.
"Алты-жети айдын ичинде 300 автобус аварияга учурады. Бирде мамыны, бирде даракты сүзүшөт, бири-бири менен кагышат. Манас проспектисинде Ахунбаевден Горькийге чейин тартип жок поезддин вагондорундай болуп тыгында турушат. Баарын иретке келтириш керек, жакында эле бир кызды тебелеп кетти", - деди ал.
Жунушалиев линияда 1090 автобус бар экенин, учурда төрт автобус оңдолуп жатканын айтты.
"300 автобус тууралуу маалымат кайдан чыкканын билбейм, эгер айдоочу күнөөлүү болсо, анын эсебинен оңдоо иштери жүргүзүлөт", - деди мэр.
