Садыр Жапаров байларды аманаттарын алтынга салууга чакырды
Садыр Жапаров бүгүн, 10-октябрда "Кыргызалтын" ачык акционердик коомунун алтын куймаларын саткан фирмалык дүкөнүнө барды. Бул туурасында президенттин администрациясынан кабарлашты.
Садыр Жапаровго маалымдалгандай, алтын куймаларын сатуунун көлөмү 50 миллион сомду түзсө, компаниянын таза кирешеси 3 миллион сомду түздү.
Азыркы учурда өлчөнгөн куймаларды бардык каалоочулар, анын ичинде башка мамлекеттердин жарандары фирмалык дүкөндөн сатып ала алышат.
"Садыр Жапаров "Кыргызалтындын" продукциясын сатып алууда эч кандай чектөө болбошу керектигин, анткени өлкөдө өндүрүлгөн алтын акыры эл аралык биржаларда сатылып, анда баалар фирмалык дүкөндөн төмөн болушу мүмкүн экенин баса белгиледи. "Кыргызалтын" ААК башкармалыгынын төрагасы Кубат Абдраимов эки жыл мурда бир килограмм алтын сатып алгандар азыркы базар баасын эске алганда, бүгүн 34 миң доллар киреше менен сата аларын билдирди", - деп айтылат маалыматта.
Президент ата мекендик алтын куймаларын сатып алуу каражат салуунун ишенимдүү жана кирешелүү жолу экенин белгиледи. Ал өлкөнүн колунда бар, бай жарандарын аманаттарын алтынга салууга үндөдү, анткени анын наркы жыл сайын өсүп жатат.
Алтын куймаларды шейшембиден ишемби күндөрүнө чейин төмөнкү дарек боюнча сатып алууга болот: Бишкек ш. Абдумомунов көч., 195.
