Эдил Байсалов: Швецияда жашоого уруксаты бар деген маалымат жалган
Министрлер кабинетинин төрагасынын орун басары Эдил Байсалов Kaktus.media сайтына Швецияда жашап турууга (вид на жительство) уруксаттын бар экендиги тууралуу маалыматка комментарий берди.
Эске сала кетсек, жалпыга маалымдоо каражаттары анын Европада жашоого уруксаты бар экенин жарыялашкан.
Ал таратылып жаткан маалымат болбогон кеп деп эсептейт.
"Биринчиден, мыйзамды изилдеп көрүңүз. Бизде башка өлкөдө жашап, кызматты ээлөөгө тыюу салынат. Мен 2019-жылы да, 2020-жылы да эч кандай арыз берген эмесмин. Бул белгилүү факт. 2008-2010-жылдары Швецияда жашагам. 2010-жылдын 8-апрелинде кайра келгем",- деди ал.
Байсалов, жашы жете элек кызы Швецияда жашаарын белгиледи.
"Бирок бул менин жашоом, менин жеке милдеттерим, анын мамлекеттик жашоого эч кандай тиешеси жок. Узак убакытка көчүү үчүн миллиондогон мүмкүнчүлүктөргө карабастан, мен Кыргызстанда жашоону улантам. Андыктан жакшы жашоо үчүн күрөшөм", - деди ал.
Эдил Байсалов ошондой эле 2008-жылы Кыргызстандан качып кеткенде Швецияда качкын катары жашап турууга уруксат берилгенин түшүндүрдү. "Качкын өз өлкөсүнө кайтаарда барган өлкөдө жашоого уруксат берүүчү документи күчүн жоготот. Андыктан көбү паспортун алмайынча 5-6 жыл келбей калат! Алар статусунан жана таттуу жашоосунан ажырап калуудан коркушат. Ал эми мен акыркы 11 жылдан бери Кыргызстанда туруктуу жашап келем ", - деп кошумчалады ал.
"Мамлекеттик жарандык жана муниципалдык кызмат жөнүндө" мыйзамга ылайык, башка мамлекеттин жарандыгы бар кызматкер мамлекеттик органдарда, жергиликтүү өз алдынча башкаруу органдарында жана жетекчилик кызматтарды ээлей албайт.
